Para pak ditësh u njoftua se kompania amerikane Pfizer dhe ajo gjermane BioNTech, kanë finalizuar me sukses vaksinën e parë 90% efektive kundër Covid-19 dhe sipas analizave paraprake, kjo vaksinë mund t’i parandalojë mbi 90 për qind të njerëzve nga kontraktimi i virusit.
Por menjëherë pas këtij lajmi reaguan dhe rusët me vaksinën e tyre “The Sputnik V” që sipas tyre është 92% efektive ndaj Covid-19. Ky përfundim erdhi pas rezultateve të përkohshme që bazohen në të dhënat e marra mes 16,000 pjesëmarrësve gjatë provave klinike.
OBSH ka kontakaur insitutin rus që po merret me zhvillimin e kësaj vaksine dhe nëse ky produkt i paraqitur përpara tyre plotëson kriteret e duhura dhe është efektive OBSH do t’i publikojë rezultatet e kësaj vaksine që e gjithë bota po e pret.
“OBSH ka qenë në kontakt me Institutin e Kërkimit Gamaleya të Epidemiologjisë dhe Mikrobiologjisë, i cili shprehu interes për të aplikuar për listën e përdorimit emergjent dhe ne shpresojmë të marrim të dhënat për vaksinën e tyre kandidate Sputnik V.
“Nëse produkti i paraqitur për vlerësim i plotëson kriteret, OBSH do t’i publikojë rezultatet gjerësisht.Kohëzgjatja e procesit për autorizim për përdorim emergjent varet nga cilësia e të dhënave të paraqitura nga prodhuesi i vaksinave dhe nga ato të dhëna që plotësojnë kriteret e OBSH-së”, thuhet më tej në deklaratë.
Pas njoftimit se vaksina e Pfizer ka treguar rezultate pozitive, Kremlini lëshoi një deklaratë vijuese në të cilën tha se vaksina e zhvilluar nga Rusia ishte po aq efektive.
“Zhvillimi i një vaksine të dytë po aq efektive është një lajm i mirë për të gjithë”, tha Oksana Drapkina, drejtoreshë e një instituti kërkimor pranë ministrisë ruse të shëndetësisë.
Në gusht Rusia u bë vendi i parë në botë që i dha miratimin rregulator kësaj vaksine.Miratimi erdhi para se të kishin përfunduar provat e sigurisë së vaksinës në fazën e tretë.
Ndërkohë kujtojmë se që nga fillimi i padnemisë e deri më tani në gjithë botën janë infektuar me Covid-19 mbi 53 milionë njerëz, ndërsa më shumë se 1.3 milionë të tjerë kanë humbur jetën.
Sipas raportit të fundit nga Universiteti Johns Hopkins, më shumë se 37 milionë njerëz kanë fituar betejën me Covid-19 e cila po vijon të përhapet me shpejtësi në gjithë botën, duke sjellë një valë të dytë më të frikshme.
