Para pak ditësh u njoftua se kompania amerikane Pfizer dhe ajo gjermane BioNTech, kanë finalizuar me sukses vaksinën e parë 90% efektive kundër Covid-19 dhe sipas analizave paraprake, kjo vaksinë mund t’i parandalojë mbi 90 për qind të njerëzve nga kontraktimi i virusit.
Ugur Sahin, drejtori ekzekutiv i ndërmarrjes gjermane BioNTech, tha për “The Guardian” se kjo vaksinë do të mund të ndalojë pandeminë Covid-19.
Ai tregoi edhe periudhën se kur do t’i kthehemi jetës normale:
“Nga mesi i vitit të ardhshëm. Por, para se të ndodhë kjo, na pret një dimër i vështirë. Edhe sikur të nisë shpërndarja e vaksinës në dhjetor, situata nuk do të ndryshojë në mënyrë rrënjësore”.
Vulnetarët që provuan vaksinën Pzifer kundër Covid-19 kanë treguar efektet e saj anësore. Sipas “Independent”, ata kanë rrëfyer se vaksina i ka lënë me efekte anësore që ndiheshin të ngjashme me një dhimbje të fortë koke pasi ke pirë.
Përveç dhimbjeve të kokës, vullnetarët që kishin provuar Pzifer kishin ndjerë gjithashtu dhimbje muskujsh.
Një grua 45-vjeçare nga Missouri, e quajtur Carrie, rrëfeu se përjetoi ethe, dhimbje koke dhe dhimbje trupi pas injeksionit të parë, gjë që e krahasoi me një grip.
Mirëpo, këto efekte anësore u përkëqësuan kur ajo mori injeksionin e dytë të vaksinës.
Deri tani, ka ende pyetje rreth asaj se sa efektive është vaksina sipas moshës dhe përkatësisë etnike dhe sa mund të zgjasë imuniteti, raporton Reuters.
Më herët, Ugur Sahin shpjegoi edhe se si do të funksionojë vaksina e Pfizer e cila pritet me padurim nga të gjithë:
“Vaksina pengon që Covid-19 të ketë akses në qelizat tona. Por, edhe nëse hyn në qeliza, ato e eliminojnë virusin. Kemi hyrë shumë thellë në sistemin imunitar për të perfeksionuar mbrojtjen e vaksinës”.
Në lidhje me kritikat e Presidentit amerikan Donald Trump, i cili akuzoi se lajmi për vaksinën u dha vetëm pas zgjedhjeve në SHBA, Sahin theksoi se hetimi farmaceutik nuk duhet politizuar.
“Hetimi farmaceutik nuk duhet politizuar kurrë. Është çështje integriteti, nuk do të kishte qenë etike që të mbanim të fshehtë informacionin. E rëndësishme është që po merremi me vaksinën dhe nuk bëjmë politikë”.
Ndërkohë kujtojmë se që nga fillimi i padnemisë e deri më tani në gjithë botën janë infektuar me Covid-19 mbi 54 milionë njerëz, ndërsa më shumë se 1.3 milionë të tjerë kanë humbur jetën.
Sipas raportit të fundit nga Universiteti Johns Hopkins, më shumë se 38 milionë njerëz kanë fituar betejën me Covid-19 e cila po vijon të përhapet me shpejtësi në gjithë botën, duke sjellë një valë të dytë më të frikshme.
