Moderatorja Fatma Methasani, e cila është kthyer në një nga figurat më të dashura të ekranit, ka treguar sesi u bë pjesë e ekranit, nga asistentja që printonte dhe dërgonte letrat në X Factor, krah Vera Grabockës.
Në një intervistë për “Oktapod”, Fatma u shpreh se ajo nuk është punësuar për bukurinë, pasi e ka ditur gjithmonë që nuk ka qenë e bukur.
“Isha ajo vajza që printonte letra, nuk është se bëja ndonjë gjë të madhe. Hyra sepse më pëlqente, më intrigonte, doja të bëja një punë, nuk më dukej vetja si ajo adoleshentja që duhet të mbaronte shkollën dhe të pinte kafe,” tregon Fatma për Turin.
Ajo filloi të punojë në TV Klan në moshën 16-vjeçare deri në moshën 19-vjeçare, kur u shkëput për të vazhduar studimet e larta për drejtësi. Aty dëgjoi për audicionet e televizionit “MAD”, “Intv” i sotëm. Dhe kur shkoi në audicione dhe pa vajza të reja të lyera e të rregulluara, iu përforcua edhe më tepër ideja se ajo nuk kishte imazhin e duhur për ekran.
“Isha e bindur se nuk isha vajza e bukur që duhet të ishte në ekran. Më kishin thënë apo ashtu mendoja unë, nuk e di ta them me siguri. Çdo vajzë që unë shihja ishte me taka, me fustan, me forma, sikundër i shohim edhe tani, ndërkohë që unë vishja tshirtin e babit në shkollë, gjithmonë me atlete, me xhinse të grisura, për hir të së vërtetës tani, nuk isha e bukur Turi,” shpjegon Fatma që tani duket se ka krijuar identitetin e saj në ekran dhe ndiher rehat me atë që përfaqëson.
