Një vajzë 5 vjeçe u shpëtua nga policia, pasi mbahej e mbyllur në një shtëpi në Moskë, që ishte vetëm me mbeturina dhe buburreca.
Vogëlushja gjysmë e zhveshur, e cila quhej Lyubov (Dashuri në rusisht) është cilësuar nga mediat rusi si “vajza Mogli”, pasi nuk flet dot apo nuk ka asnjë aftësi komunikimi. Ajo ishte lënë e dehidratuar dhe e sëmurë nga nëna e saj Irina Garashchenko, e cila nuk kishte ardhur prej ditësh për ta takuar.
Gjendja e banesës ishte aq skandaloze sa policia përdori veshje mbrojtëse kundër kimikateve, për të hyrë brenda. Një varëse i ishte futur brenda mishit të qafës, ndërsa sipas raportimeve ajo nuk mund të fliste, por bënte vetëm tinguj.
Policia ishte thirrur nga një fqinj që dëgjoi vajzën të qante:
“Gati na ra të fikët nga gjendja e shtëpisë dhe era e keqe. Vajza ishte ulur në parvazin e dritares dhe qante. Nuk kishte ushqim. Kishte buburreca kudo”.
Fqinjët thanë që gruaja solli në shtëpi një bebe pesë vite më parë, por më pas e dërgoi atë të jetonte me gjyshen. Bashkëshorti i saj ishte dëbuar në Ukrainë.
Në fakt fëmija ndodhej ende në banesë dhe mund të mos ketë dalë asnjëherë jashtë që kur ishte foshnjë. Fqinjët thanë se gruaja ishte e mbajtur dhe kishte një punë të mirë.
Burimi: Daily Mail
