Një histori prekëse u soll sot në emisionin “Dua të të bëj të lumtur”, ku një nënë tregoi sakrificat e mëdha për vajzën e saj Egzona, për të cilën ka luftuar prej vitesh për t’i rikthyer shikimin.
Në studio kishte ardhur Adelina, kushërira e Egzonës e cila rrëfeu se Filxhonia kishte ëndërruar gjithmonë të kishte një vajzë dhe se ardhja e vogëlushes në jetë kishte gëzuar pa masë të gjithë familjen.
Por kur Egzona ishte 2-muajshe nëna e saj kishte kuptuar se vajza nuk e ndiqte me sy dhe se nuk e përqendronte shikimin në asnjë vend.
Ajo duhej të operohej sa më shpejt, por mjekët kishin zbuluar se Egzona kishte probleme me zemrën dhe për këtë arsye nuk e kishin marrë përsipër ndërhyrjen në sy.
Operacioni i zemrës ishte i kushteshëm dhe një ndërhyrje e tillë nuk kryhej në Shqipëri. Pas 3-vitesh me ndihmën e një organizate humanitare vajza i ishte nënshtruar ndërhyrjes kirurgjikale në zemër në Itali dhe tani mund ta përballonte një ndërhyrje tjetër në sy.
Gjatë programit “Dua të të bëj të lumtur” u dha lajmi i bukur se doktor Amarildo Belshi në qendrën Spitalore Universitare “Nënë Tereza”, do të merrte përsipër operacionin e Egzonës, për t’i kthyer asaj shikimin.
E lumtur nga ky lajm, Filxhonia u shpreh se kjo ishte brenga e saj dhe se do të luftojë që Egzona të arrijë ta shohë botën me sytë e saj.
https://www.instagram.com/p/CBGyp0JnlvD/
