Ka ca kohë që mediat rrëmojnë shenja të një krisjeje të marrëdhënieve mes dy çifteve më të famshëm mbretërorë në planet.
Por dje, kur u zbulua se Harry dhe Meghan nuk e ndiqnin më princin William dhe dukeshën Kate në Instagram, u duk se shenjat ishin tashmë mëse të qarta se po, një sherr mes William dhe Harry-t paskësh ndodhur vërtet.
Edhe pse në fakt, ishte një çështje krejt formale ajo për të cilën vendosën të mos i ndjekin kunetërit e tyre në Instagram (lexoje këtu) kjo telenovelë mbretërore duket se është tepër e bukur për t’u lënë në harresë kaq thjesht.
Sot, Meghan dhe Harry vendosën të tregojnë se s’ka drama në familje, duke i lënë një urim të ëmbël mbesës së tyre në ditëlindjen e saj të 4-t. Një urim i cili fatkeqësisht, nuk u prit aspak mirë nga fansat e familjes së princit William për shkak se sipas tyre, Meghan dhe Harry ishin treguar tepër jo-formalë.
Përmes Instagram-it zyrtar të Pallatit të Sussex-it, ata komentuan:
“Gëzuar ditëlindjen, Charlotte! Shumë dashuri, H dhe M”.
Problemi është, se ata nuk iu drejtuan Charlotte-s së vogël me titullin “Princeshë”. E në fakt, nuk është hera e parë që Harry dhe Meghan i neglizhojnë titujt mbretërorë kur u drejtohen nipërve të tyre.
Edhe në urimin e ditëlindjes që i bënë princit të vogël Louis, ata përsëri nuk e përdorën titullin “Princ”.
Por, a është e detyrueshme edhe për Harry-n dhe Meghan-in përdorimi i etiketave? Sipas ekspertit të etiketave William Hanson, nuk është aspak e nevojshme për ta. Ai u shpreh për “DailyMail” se, duke qenë se marrëdhënia e tyre me të vegjëlit është më e afërt, u lejohet neglizhimi i titujve.
Ndërkaq, Meghan vijon të jetë në pritje të ëmbël të fëmijës së tyre të parë, i cili është parashikuar të lindë pikërisht tani, në pranverë. Megjithatë, lajmi i madh nuk po vjen ende, pavarësisht padurimit të ndjekësve besnikë të Dukës dhe Dukeshës së Sussex-it.
