Një tragjedi po zhvillohet në Karaibe pas goditjes së fuqishme të uraganit Melissa, i cili ka shkaktuar shkatërrim të madh në Haiti dhe dëme të konsiderueshme në Xhamajka e Kubë. Sipas përditësimit të fundit nga Qendra Kombëtare e Uraganeve e SHBA-së (NHC), stuhia është zhvendosur tashmë në brigjet lindore të Kubës, në Atlantikun jugperëndimor, duke mbajtur ende një intensitet të rrezikshëm.
Ekspertët e NHC raportojnë se erërat maksimale të qëndrueshme janë ngadalësuar në 160 km/orë, pas një nate të furishme mbi Karaibe. Një ditë më parë, kur Melissa preku tokën në Xhamajka, ajo solli erëra me shpejtësi 190 km/orë, duke e bërë një nga ciklonet më të fuqishme të regjistruara ndonjëherë në pellgun e Atlantikut.
Kryebashkiaku i qytetit bregdetar Petit-Goâve, Jean Bertrand Subreme, ka konfirmuar për agjencinë Associated Press se 25 persona kanë humbur jetën, pasi lumi La Digue doli nga shtrati duke përmbytur dhjetëra banesa.
“Jam i tronditur nga situata. Shumë familje janë ende të bllokuara nën rrënoja dhe kanë nevojë për ndihmë urgjente,”– tha ai, duke i bërë thirrje qeverisë për ndërhyrje të menjëhershme.
Sipas dëshmive nga terreni, dhjetëra shtëpi janë përmbytur dhe shembur, ndërsa ekipet e shpëtimit po përpiqen të arrijnë zonat më të izoluara që nga mëngjesi i sotëm.
Në Xhamajka, autoritetet po vlerësojnë dëmet e shkaktuara nga stuhia që goditi me fuqi të jashtëzakonshme një ditë më parë. Ndërkohë, Kuba lindore është nën vëzhgim të vazhdueshëm, pasi Melissa po kalon në brigjet e saj me shpejtësi të moderuar, por ende të rrezikshme për banorët lokalë dhe infrastrukturën.
Ministri i Arsimit i Haitit, Morris Dixon, gjatë një konference për shtyp, dha përditësimin më të fundit mbi gjendjen e vendit:
-77% e territorit është pa energji elektrike, ndërsa kompania publike e shërbimeve ka nisur procesin e rivendosjes në zonat me dëme minimale;
-Ana perëndimore e ishullit është prekur më rëndë, ndërsa kryeqyteti dhe disa rajone të tjera kanë shpëtuar pa dëme të mëdha;
-Kryeministri pritet të vizitojë sot zonat e prekura për të parë nga afër dëmet;
-70 nga 700 sistemet e ujit janë aktualisht jashtë funksionit, sipas vlerësimeve të para;
-Qeveria ka siguruar ndihmë teknologjike nga rrjeti satelitor Starlink për të ruajtur funksionimin e komunikimeve bazë;
-Aeroporti ndërkombëtar i Kingstonit pritet të rihapet nesër për fluturime ndihme humanitare.
Agjencitë ndërkombëtare të emergjencave janë në gatishmëri për të dërguar ndihma në zonat më të goditura. Kombet e Bashkuara dhe Kryqi i Kuq kanë konfirmuar se po përgatisin ekipe humanitare dhe furnizime për Haiti dhe Xhamajkë.
Ndërsa Melissa vijon të lëvizë drejt veriut, banorët e Karaibeve përballen me pasojat e saj të rënda.
Por përtej humbjeve dhe dëmeve, qeveritë lokale dhe organizatat humanitare po përpiqen të rivendosin normalitetin dhe të ndihmojnë komunitetet e prekura që të ringrihen.
