Alphabet, kompania mëmë e platformës së njohur YouTube, ka thënë se mediat shtetërore ruse nuk do të mund të përfitojnë më nga reklamat në këtë rrjet. Kjo nënkupton që Russia Today (RT) dhe kanale të tjera nuk mund të marrin para nga reklamat në YouTube dhe faqe tjera që janë në pronësi të Alphabet.
Kompania ka thënë se këto media as nuk do të mund të blejnë reklama përmes shërbimeve të kompanisë Google.
Një zëdhënës ia ka atribuar këtë vendim “situatës së jashtëzakonshme” dhe ka thënë se Alphabet do të “marrë masa tjera nëse është e nevojshme”.
Ky vendim vjen pasi Ministri për Transformim Digjital në Ukrainë, Mykhailo Fedorov, ka thënë se i ka kërkuar platformës YouTube që të bllokojë propagandën ruse.
Mediat shtetërore – sidomos RT – fitojmë miliona dollarë në vit nga reklamat në YouTube dhe nga shërbime tjera të Google.
Facebook dhe Twitter tashmë kanë bllokuar reklamat nga Rusia. Autoritetet ruse kanë kufizuar qasjen në të dyja këto platforma.
Rikujtojmë se Rusia dhe Ukraina janë në ditën e katërt të luftës. Bombardime të rënda gjatë natës në Kiev goditën një depo karburanti, një tubacion gazi dhe aeroportin.
Trupat ruse kanë hyrë në Kharkiv, ku një betejë e ashpër po zhvillohet në rrugë. Rusia thotë se është gati për negociata me Ukrainën në Bjellorusi.
Ukraina gjithashtu është gati për negociata, por jo në Bjellorusi – vendi nga i cili janë larguar trupat ruse që po shkatërrojnë Kievin.
