Pandemia e COVID-19 i ka dhënë një shuplakë të fuqishme turizmit në Shqipëri pasi masat e izolimit e frika e përgjithshme e infektimit nga virusi i rrezikshëm pritet të reduktojnë në mënyrë drastike numrin e turistëve që vizitojnë vendin tonë.
Por teksa në studiot televizive e mbledhjet e qeverisë flitet vazhdimisht për strategji për ta bërë Shqipërinë sa më tërheqëse për ata që do të kenë mundësi ta vizitojnë, në realitet masat e marra duket se tentojnë më shumë t’i stepin turistët.
Një gjë të tillë e ka treguar ditën e sotme blogerja e udhëtimeve Fjorda Llukmani, që ka padyshim një prej profileve në Instagram më interesantë, veçanërisht për të apasionuarit e udhëtimeve. Në një postim në Insta Story, ajo ka treguar se këtë vit janë rritur në mënyrë drastike çmimet për të vizituar parkun arkeologjik të Butrintit.
“Nga 700 në 1000 lekë bileta për Butrint, meqë jemi në periudhë post-pandemie. Hallall Ministria e Turizmit dhe Mjedisit, paskeni punu fort fare!”-shkruan Fjorda.
Në një prononcim për “iconstyle.al”, ish-drejtori i qendrës Arkeologjike të Butrintit, Auron Tare ka thënë se rritja e çmimit duhet të reflektojë shërbimin që marrin qytetarët në këtë qendër arkeologjike. Sipas tij, problemi kryesor është prishja e sistemit të operimit në Butrint, dhe shuma hallka të tjera në menaxhimin e një qendre, që është pjesë e UNESCO-s.
“Çdo rritje çmimi në një park kombëtar apo qendër arkeologjike duhet të reflektojë shërbimin që merr publiku në këtë qendër. Kjo rritje bëhet në kuadër të një plani menaxhimi, i cili parashikon një strategji zhvillimi afat mesëm dhe afat gjatë. Unë mendoj se problemi kryesor në Butrint nuk është thjesht rritja e biletës por prishja e të gjithë sistemit të operimit në Butrint që u krye prej vitesh. Sot menaxhimi i Butrintit nuk është i qëndrueshëm dhe mungojnë shumë hallka në zinxhirin menaxhues të një qëndre të pasurive botërore të “UNESCO”-s”, shprehet Tare.
Nuk dimë kë të falenderojmë më parë, Margaritin apo Klosin për këtë metodë për të joshur turistët, por merita u takon atyre! Në një kohë krize nga pandemia që pushtoi vendin për 3 muaj dhe me pasojat e krizës që ka lënë pas, rritja e çmimeve në vende të tilla tërheqëse për turistët, vetëm i step ata!
Edhe pse viti 2020 është parë nga ana ekonomike si viti i mbijetesës, ekspertët mendojnë se rritja e çmimeve, nuk do të bënte që turizmi të “mbijetojë”. Ulja e çmimeve, është mënyra më e mirë për të joshur turistët, veçanërisht ata vendas, që mos të braktisin vende të tilla me rëndësi arkeologjike, apo dhe vetë sezonin turistik.
Në një prononcim për “iconstyle.al” kreu i Shoqatës së Turoperatorëve dhe Agjencive Turistike, z. Rexhep Kasmi tha se strategjia e vetme për të tërhequr sa më shumë turistë është krijimi i bonuseve për ta. Shpresojmë që Ministria e Turizmit dhe ajo e Kulturës të gjejnë forma të tjera për të joshur turistët, pasi duket se e kanë nisur me këmbën e gabuar!
/Iconstyle.al
