Ndërsa ndodhet i shpallur në kërkim ndërkombëtar, ish-kryeministri maqedonas Nikolla Gruevski vendosi të reagojë publikisht.
Ai përdori “Facebook”-un për të bërë një reagim, ku tregon se ndodhet në Budapest dhe ka kërkuar azil politik pikërisht në këtë vend.
“Gjatë këtyre ditëve kam marrë kërcënime për jetën. Tashmë jam në Budapest dhe kam kërkuar azil politik nga autoritetet hungareze. Do të mbetem gjithmonë besnik ndaj çështjeve të Maqedonisë. Nuk do të heq kurrë dorë!”, shkruan Gruevski.
Ndërkohë ministri i Brendshëm, Oliver Spasovski tha se përgjegjësinë duhet ta marrë Gjykata, për shkak se nuk caktoi masën e paraburgimit.
Gruevski kërkohet nga policia për të vuajtur dënimin prej 2 vitesh burg për rastin “Tanku”, e cila ka të bëjë me blerjen e makinës luksoze “Mercedes” në vlerë prej 600 mijë eurove duke shkelur ligjin.
Vendimi për arrestimin e Gruevskit erdhi pas njoftimit nga Gjykata Penale, e cila nuk mundi të gjente të akuzuarin për t’i dorëzuar vendimin që menjëherë të paraqitej në burg.
