Një ngjarje e rëndë shokoi dje Fierin, kur një 16-vjeçar u vra me thikë në mes të rrugës nga shoku i tij i ngushtë. Viktima është Dionis Vrenozi, i cili ndërroi jetë në zonën e “Zogut të Zi”, pranë gjimnazit “Janaq Kilica”.
Ai u transportua në spital në gjendje të rëndë, por nuk mundi t’i mbijetonte plagës së marrë. Pas dëshmive, policia identifikoi autorin 17-vjeçar, Florian Gega, i cili u vetëdorëzua tre orë pas ngjarjes.
Burime për “Gazeta Shqiptare” bënë me dije se, Dionis Vrenozi, Florian Gega, si dhe një adoleshent tjetër, kanë qenë shokë të ngushtë.
Pasditen e djeshme, pas mbarimit të mësimit ata kanë qenë të tre së bashku në rrugë, kur ka nisur debati mes Dionisit dhe Florianit. Mësohet se gjimnazisti tjetër nuk është përfshirë në sherr.
Në grindje e sipër, Floriani ka nxjerrë thikën dhe e ka goditur në zemër shokun e tij të ngushtë dhe më pas është larguar nga vendi i ngjarjes.
“Ndonëse me thikën në gjoks, 16-vjeçari ka bërë ca hapa dhe më pas ka rënë tokë”, kanë thënë dëshmitarët okularë, të cilët njoftuan menjëherë spitalin dhe policinë.
