Pas ngjarjes së rëndë të ndodhur në Itali disa ditë më parë, ku u ekzekutua 36-vjeçarja Klodiana Vefa, nënë e dy fëmijëve, nga bashkëshorti i saj, ka reaguar dhe mikesha e saj e ngushtë.
Ajo tregon në një intervistë për “La Nazione”, se ishte në dijeni të ngjarjes dhe se e ndjera kishte frikë prej Alfredit, duke qenë se ai dallonte që ishte i dhunshëm.
Shoqja rrëfen se ndjen faj dhe dhimbje për ngjarjen për faktin se ishte e pritshme që autori mund të ndërmerte një akt fatal. 36-vjeçarja i kishte treguar asaj se i shoqi mbante një armë dhe se prej ditësh ishte shumë e shqetësuar për fëmijët.
Intervista
Po, pse Klodiana nuk e ka denoncuar ish-bashkëshortin nëse ndihej në rrezik?
Shoqja: Për fëmijët e saj. Ajo kishte frikë se nëse do ta bënte këtë ai do t’i lëndonte fëmijët e saj. Ajo mendoi se edhe sikur ta denonconte, asgjë nuk do të ndryshonte. Më thoshte se ai gjithsesi do të bëjë çfarë të dojë. A e dini si ishte ajo?
Si?
Shoqja: Ajo donte të ishte e lumtur, po përpiqej me të gjitha forcat. Kishte gjetur një person me të cilin ndihej rehat.
Nëse mund të kthenit kohën pas, çfarë do të bënit?
Shoqja: Do të shkoja në polici dhe do ta denoncoja me ose pa pëlqimin e Klodianës. As unë dhe as partneri im nuk kishim dëshirë të shkonim kundër dëshirës së saj. Kemi këmbëngulur shumë. U përpoqëm ta bindnim në çdo mënyrë. Por në fund ajo na e preu duke thënë: Ne jemi shqiptarë, nuk e kuptoni. E kemi respektuar deri në fund mendimin e saj.
A kishte dijeni për armën ose për një akt të tillë?
Shoqja: Ajo që mund të them është se Klodiana e ndjeu se do ta vriste. Ajo nuk ma tha kurrë hapur, por një herë ma bëri të qartë se kishte armë, duke shtuar një fjali: Tani po më mbaron koha.
