Ivana Trump, gruaja e parë e Donald Trump dhe nëna e tre fëmijëve të tij më të mëdhenj, vdiq nga dëmtimet e mëdha në trup, si pasojë e një rënie aksidentale. Kjo ishte deklarata që dha të premten kryeekzaminuesi mjekësor i qytetit të New York-ut.
Ish-presidenti njoftoi se Ivana Trump vdiq në moshën 73-vjeçare një ditë më parë në shtëpinë e saj në Manhattan, por nuk përfshiu asnjë detaj në lidhje me shkakun apo mënyrën e vdekjes së saj.
Të premten, një zëdhënës i zyrës së kryeekzaminuesit mjekësor të qytetit të New York-ut konfirmoi raportet se Ivana Trump me sa duket ra pa dashje dhe u gjet pa jetë në fund të shkallëve të shtëpisë së saj.
“Nëna jonë ishte një grua e jashtëzakonshme, një forcë në biznes, një atlete e klasit botëror, një bukuri rrezatuese, nënë dhe mike e kujdesshme. Ivana Trump ishte një e mbijetuar. Ajo iku nga komunizmi dhe e përqafoi këtë vend. Ajo i mësoi fëmijët e saj për guximin dhe ashpërsinë, dhembshurinë dhe vendosmërinë”- tha familja Trump në një deklaratë.
Në një deklaratë në platformën e tij “Truth Social”, Donald Trump e kujtoi Ivanën si një “grua të mrekullueshme, të bukur dhe të mahnitshme, e cila bëri një jetë të mrekullueshme dhe frymëzuese”.
“Krenaria dhe gëzimi i saj ishin tre fëmijët e saj, Donald Jr., Ivanka dhe Eric”, ka shkruar ai. “Ajo ishte aq krenare për ta, ashtu siç ishim të gjithë aq krenarë për të.”
