Më 27 gusht 2013-s, katër vite më parë administratorja e një “call-center” në Tiranë u sulmua me acid nga një person, ndërsa po shkonte për në punë. Ngjarja ndodhi një javë pasi Vilma Dule shkarkoi nga puna disa prej operatorëve. Nga ai moment jeta e saj ndryshoi tërësisht, por Vilma vendosi që të luftonte për jetën e saj, për të ndryshuar rrugën e fatit.
Tashmë 30-vjeçarja pati guximin të rrëfejë para të gjithëve ngjarjen e tmerrshme që i ndodhi 4 vite më parë.
Ajo sot është një grua që i dashuron vragat në fytyrë sikur të ishin rrënjë, sepse në jetë nuk duhet të dorëzohesh kurrë, çfarëdo që fati të përball.
Vilma është kthyer në profilin e saj përsëri, këtë herë me një mesazh falënderimi. Kanë qenë të shumtë njerëzit që e kanë përkrahur dhe mbështetur, madje duke e pyetur sesi ia ka dalë të përballojë një sfidë kaq të vështirë dhe Vilma ka një përgjigje: mirënjohje.
Mesazhi i plotë i Vilma Dule:
Përshëndetje Luftëtarë,
Sot më keni dërguar një pafundësi mesazhesh kuptimplotë, ku më përgëzonit për forcën që kam treguar për të përballuar atë sulm, aq të ashpër dhe të pa besë.
Shumë prej jush më pyetën se cili ishte burimi i forcës sime?
Nga vinte gjithë kjo kurajë?
Çfarë mund të them???
Mund t’ju shkruaj që për të përballuar çdo vështirësi që na vjen përpara, në fillim duhet të mësojmë të jemi: “Mirënjohës”.
Mirënjohës ndaj të qenit akoma në jetë.
Mirënjohës ndaj gjërave të thjeshta që na rrethojnë dhe ndaj gjesteve të përditshme që i marrim për të mirëqena.
Mirënjohës ndaj kësaj dite që kaloi dhe faktit që sot punuat, u kujdesët për fëmijët apo që keni miqtë dhe familjen pranë..
Çfarëdo që të keni bërë sot, me siguri, ka patur diçka për të qenë mirënjohës.
Vetëm në ketë mënyrë mund të fillojmë ti shikojmë problemet si zgjidhje dhe jo si pengesa të pakalueshme. Gëzojuni të gjitha gjërave të bukura, përballuni me ato të shëmtuarat, me bindjen se ato erdhën për të na mësuar diçka që nuk e dinim më parë.
Unë sot, JU JAM MIRENJOHESE JUVE, sepse më keni rrethuar me lavda dhe krenari.
Ma bëtë ditën më të bukur, ndjesitë janë unike.
Faleminderit!
