Vrasja tragjike e 21-vjeçares Ariela Murati nga Aldison Belulaj, për shkak të një dashurie të refuzuar, tronditi mbarë opinionin shqiptar. Familja Belulaj nuk u pranua në varrimin e Arielës dhe tashmë ka nisur frika për fillimin e një hasmërie mes dy familjeve.
Situata mes tyre duket se vazhdon të jetë e tensionuar dhe sot familjarët e Aldisonit kanë qenë në vendin ku studentja u ekzekutua nga djali i tyre, ku kanë lënë një mesazh për të ndjerën.
“Ariela Murati shpirti jot u prehtë në paqe. Ngushëllimet më të thella dhe keqardhje ju shprehim familjarëve të tu. Nga familjarët Belulaj”, shkruhet në pankartën që është vendosur në vendin e krimit.
Ky gjest i familjes së Aldisonit erdhi pas deklaratës që babi i Arielës dha një ditë më parë për gazetën “Panorama”, ku deklaroi se ishte prerë në besë nga familja Belulaj. Ai tregoi se ata i kishin shkuar në shtëpi dhe i kishin premtuar se vajzës nuk do t’i prekej asnjë fije floku.
