Rudina Xhunga ka nxjerrë nga studioja e emisionit “Dritare me Rudinën”, një juriste që ishte prezantuar si studente.
Pas lidhjes me “Skype” gjatë emisionit ish-zëvendësministri i Arsimit , Taulant Muka ka zbuluar se një nga të ftuarat në studio, e prezantuar si studente, punon juriste pranë Ministrisë së Arsimit, Sportit dhe Rinisë.
Komentin e Mukës e lexoi edhe drejtuesja e emisionit, Rudina Xhunga, duke sjellë edhe debate në studio deri në largimin e juristes.
“Më ke ardhur për studente, por ti punon në ministri. Ti përfaqëson ministrinë. Unë mendoj që nuk mund të jesh në studio, pa të fyer fare”, i tha Xhunga, teksa i kërkoi largimin nga emisioni.
Më herët juristja e zbuluar nga Muka, si Adelina Laci, tha se ka mbaruar dy fakultete, atë të Gjuhë-Letërsisë dhe Drejtësisë.
“Jam shumë e qetë, jam juriste me kontratë, jam futur me studentët që kanë fituar përmes praktikave të punës. Kam mbaruar dy fakultete, Gjuhë-Letërsi dhe Drejtësi. Unë Drejtësinë e kam fakultet të dytë, dhe kam mbaruar me rezultate të shkëlqyera. Nuk më është dashur të hy dy herë për të marrë një provim. Mesatarja ime është 9.8”, tha ajo.
