“Ua, shiko sa i mirë ai mi! I mirë, i mirë, por jo në të gjitha drejtimet”. Me siguri ju kujtohet kjo frazë që mbetet ende epike. Por në atë kohë nuk njihnit një nga tre imazhet kryesore të reklamës, Xhejmsi Dervishi, vajza e cila u përfol nga mediat rozë si zëvendësuesja e moderatores Marina Vjollca në emisionin “Procesi Sportiv”.
22-vjeçarja e cila ka nisur prej 7 vitesh rrugën e modës është përfshirë në pasionin për sportet dhe dëshiron të ndjekë ëndrrën e prezantueses.
Ajo thotë se është shumë entuziaste dhe ju do ta besoni plotësisht pasi të shikoni intervistën që zhvilluam me të. Ne, “ICONstyle”, dëshironim ta njihnim më mirë Xhejmsin, ndaj zgjodhëm të kishim një bisedë të lirshme me të, përmes së cilës të kuptonit në mënyrë të drejtpërdrejt emocionet në përgjigjet e saj.
Si e përshkruan veten me dy fjali?
Shumë pozitive, njeri i lumtur me shumë pasione, që pëlqen shumë që të mësoj gjëra të reja dhe gjatë gjithë kohës në kërkim të gjërave të reja duke investuar te vetja.
Emri Xhejmsi me siguri ju ka bërë dhe ju shumë përshtypje. Është e vetmja femër në Republikën e Shqipërisë që mban këtë emër.
Mban emrin e gjinisë mashkullore nëse i bazohemi gjuhës shqipe. Sa karakter “mashkulli” gjendet brenda Xhejmsit?
Duke qenë se jam feministe dhe synoj shumë te barazia gjinore, kështu që , nuk mund të bëj një ndarje të karakteristikave femërore dhe mashkullore. Nuk e di se çfarë është karakter mashkullor. Jam shumë e fortë.
Si nis dita jote dhe si përfundon?
Nëse do të thosha një fjalë është energji. Nis me shumë energji dhe përfundon me shumë energji. Sa zgjohem kam dy gota ujë të mëdha dhe dhëmbët. Nëse do të tregoj një rutinë të ditës, paraditen e kam të lirë për aktivitete të ndryshme që unë dua të bëj, në drekë përpiqem të kem pak pushim dhe pasditja është e rezervuar për palestrën, që është punë dhe pasion njëkohësisht. Tani që vjen vera dhe është edhe më ngrohtë, darkave edhe mund të dalë.
Po “çmenduria” më e madhe që ke bërë?
Unë nuk i quaj çmenduri akoma, i quaj aventura. Sepse çmenduri kam plane të mëdha për të bërë. Por aventura kam shumë, më pëlqejnë shumë. Nuk di nëse quhet, të shkosh në varreza natën, ose të lahesh në det në dimër, ose një pjesë e mirë e aventurave të mia lidhen me alkoolin.
Je e “dashuruar” pas alkoolit?
Jo, ai ka marrëdhënie të mirë me mua. Gjithsesi, në 2016-n e kisha në ato synimet e para, që do ta kufizoja shumë alkoolin në jetën time dhe faktikisht ja kam dal. Dhe tani e kam në kontroll. Unë faktikisht jam tip që më pëlqen ta kem jetën time në kontroll, si me ushqimin, apo marrëdhëniet me njerëzit.
Po synimet e 2017-s?
Të filloja gjëra të reja, do të thotë planet që kam pasur prej kohësh të filloja të punoja për to. Dhe të kem sukses.
Xhejmsi është bukuri e nënës natyrë apo e kanë ndihmuar edhe “squats”…
Është gjenetike! Por si çdo gjë gjenetike është mirë që të punosh për të. Unë jam gjenetike dhe palestra më ndihmon që të mbaj format e mia dhe pse jo t’i përmirësoj.
Të kujtohet puthja e parë, zbulim apo zhgënjim?
Ishte zbulim i një miqësie të mirë.
Cila është strategjia jote e joshjes?
Për mua pjesë shumë e rëndësishme e joshjes është shikimi.
Kategoritë e djemve që nuk të pëlqejnë?
Këtu të pret një listë e gjatë. Jo inteligjentë, ose djemtë që përdorin mjete si makina apo paratë. Është shumë “ok”, t’i duash dhe t’i synosh dhe t’i kesh, por jo t’i përdorësh për të prezantuar veten. Dhe nuk më pëlqejnë njerëzit që gënjejnë. Apo njerëzit sipërfaqësorë.
Seksi pasuron dashurinë? Apo e kundërta?
Mendoj se janë mënyra që ecin me njëra-tjetrën. Do të thotë që seksi është shumë i rëndësishëm për dashurinë dhe dashuria duhet të jetë pjesë e seksit.
Modele apo prezantuese?
Prezantuese, sepse me anë të prezantimit e shoh si një mënyrë, përveç se të kesh interaktivitet dhe të japësh nga vetja. Dhe mua më pëlqen të jap nga vetja dhe mendoj që kam për të dhënë nga vetja.
Flitet se do të jesh pjesë e moderimit të “Procesit Sportiv”, sa e vërtetë është? (minuta 3:37)
Në fakt është një lajm që ka mbuluar portalet këto ditët e fundit, por e vërteta është që nuk ka asgjë faktike. Thjesht isha e ftuar tek “Procesit Sportiv” dhe përveç se kalova shumë mirë dhe u kënaqa, kishte një lloj impresioni. Kështu që nga kjo dolën fjalë dhe thjesht nga kjo u përhapën.
E ke menduar ndonjëherë se ke diçka të përbashkët me Marina Vjollcën?
Marinën e simpatizoj shumë si personazh, por nuk e kam tendencën që të bëj krahasime. Nuk e kam menduar ndonjëherë.
Fjalia që ia thua vetes çdo ditë para pasqyrës?
Në varësi të gjendjes emocionale, kur jam poshtë i them që jam lart dhe kur jam lart i them që jam dhe më lart.
Personi publik që mendon se e ka ekzagjeruar me operacionet?
Të gjithë!
Po Xhejmsi ka bërë ndonjë ndërhyrje?
As edhe një ndërhyrje.
Mesazhi drejtuar femrave…
Lexoni shumë. Dhe kur them lexoni nuk e kam fjalën për romanet e dashurisë. Pse jo ato janë mënyrë e mirë për të kaluar kohën. Por lexoni, informohuni, jo vetëm për gjërat që ju interesojnë për pasionet, por për më tepër. Dhe më e rëndësishmja, kuptoni sa të forta dhe të rëndësishme jeni.
Mesazhi drejtuar meshkujve…
E njëjta gjë, informohuni… dhe mos gënjeni.
Burimi: ICONstyle
