Komiteti Teknik i Ekspertëve paralajmëroi se ditën e djeshme do të bënte një mbledhje për të vendosur masa të reja. Pavarësisht se qytetarët priten gjatë gjithë ditës së hënë për këtë mbledhje asgjë nuk ndodhi.
Mbledhja e Komitetit të Ekspertëve është shtyrë për një afat të pacaktuar. Shefja e Departamentit të Sëmundjeve Infektive në Institutin e Shëndetit Publik, Silva Bino, ka thënë për “Abcnews.al” se mbledhja do të zhvillohet, por po presin një thirrje nga kryetarja, Mira Rakacolli.
“Do mblidhemi, por duhet të pyesni kryetaren. Presim të na mbledhë kryetarja”, është shprehur Bino.
E pyetur në lidhje me rekomandimet që ajo do të japë në mbledhjen e ekspertëve, Bino nuk ka preferuar të japë detaje.
Javën e shkuar komiteti vendosi të lërë të pandryshuara masat kufizuese duke lënë në fuqi orën policore nga ora 20:00 deri në 06:00 të mëngjesit.
Deri më tani janë përfolur disa skenarë të ndryshëm për shtrëngimin e masave anti-Covid. Zëvendës ministrja e Shëndetësisë, Eugena Tomini, është shprehur se 2 propozimet kryesore janë stacionimi i orës policore ose zgjatja e saj.
Gjithashtu është përfolur se mund të kemi një izolim total si marsin e vit të shkuar për 1 muaj, mbyllje përgjatë fundjavës, ose kalimi i të gjitha shkollave, 9-vjeçare dhe gjimnazeve, online. Megjithatë vendimi për masat e reja pritet të komunikohet nga vetë autoritetet shëndetësore ditët në vijim, pasi të vendoset një ditë e saktë për mbledhjen e Komitetit Teknik të Ekspertëve.
