Kompozitori i njohur, Aleksandër Lalo, u nda nga jeta papritur nga një atak kardiak. Ajo që tërhoqi më shumë vëmendjen nga teleshikuesit ishte transmetimi i emisionit “C’est la vie”, në të cilin Lalo ishte pjesë e jurisë.
Lajmi u bë publik nga miku i tij Petrit Ruka: “Miq po ju njoftoj nga spitali se sapo ndërroi jetë miku im më i afërt, kompozitori Aleksandër Lalo… Dhimbje pa fund”.
Pas lajmit të hidhur miq, dashamirës dhe bashkëpunëtorë të tij, nisën të ndanin dhimbjen për këtë humbje të papritur edhe nga profilet e tyre sociale.
69-vjeçari Aleksandër Lalo ishte një nga kompozitorët më në zë shqiptarë. Firmën e tij e mbajnë shumë kolona zanore të filmave shqiptarë, por edhe pjesëve teatrore si, “Treni niset në shtatë pa pesë”, “Dy herë mat”, “Një vonesë e vogël”, Shi në plazh”, etj.
Ka kompozuar po ashtu këngë të muzikës së lehtë. Lalo ishte një nga zërat e rëndësishëm të muzikës shqiptare, një mbrojtës i muzikës së mirë dhe origjinale, duke kritikuar hapur degradimin e saj gjatë viteve të fundit.
