Një grua e braktisur nga djali i saj, bashkëshorti, nëna dhe motrat, ka kërkuar ndihmën e rubrikës “Ka një mesazh për ty”, te “E diela shqiptare”.
Pas ndarjes nga bashkëshorti Edlira është braktisur nga e gjithë familja, djali 14-vjeçar dhe motrat që nuk duan të kenë asnjë kontakt me Edlirën.
Sipas tyre, Edlira ka tradhtuar bashkëshortin me një koleg pune dhe është fajtore për gjithçka:
“Më akuzoi për tradhti, gjë që nuk ishte e vërtetë dhe e dinte shumë mirë. Thjesht për një fotografi, thjesht për një shoqërim në urgjencë kur unë ndihesha keq. Unë jam ndjerë keq një natë në vendin e punës ku unë punoj tani aktualisht, në një piceri si kamariere, jam ndier keq një natë dhe ka qenë fund maji 2017. Kam tentuar ta marr në telefon ish- bashkëshortin tim, nuk më është përgjigjur”, ka sqaruar situatën Edlira.
Ajo madje ka folur edhe për ditën kur nisën probleme, dhe gjithçka filloi kur kolegu i punës e shoëroi në urgjencë pasi nuk ndihej mirë:
“Unë jam shoqëruar nga kolegu i punës në urgjencë. Dhe për këtë, e quajtën tradhti. Aty filluan problemet. Ish-bashkëshorti komunikonte me nënën time dhe me motrat e mia, kurse me mua nuk fliste asnjë njeri. Mua më veçuan. Nëna besoi që kjo ishte tradhti. Kjo është e keqja. Si mund të besosh? Nëna dhe motrat e mia më mbyllën derën, të gjitha përveç njërës”, tregoi Edlira.
Por nëna e saj nuk e mirpriti mesazhin dhe nuk kërkoi aspak të sqarohej me Edlirën:
“Ik! Hiqe kamerën të lutem.Nuk kam nevojë për mesazhe. Shumë faleminderit. Nuk kam nevojë për mesazhe. Ikni tani të tërë”, tha mamaja e Edlirës.
“Doja ta shikoja nënën time drejt në sy, e t’i thoja pse? Unë jam jot bijë, për çfarëdolloj arsye, unë jam jot bijë, e do të ngelem e tillë përjetë. Jam shumë e lënduar, jam shumë e vrarë shpirtërisht për çdo gjë”, përfundoi Edlira.
