Gjykata e Beratit ka pezulluar nga detyra ditën e djeshme Drejtorin e Burgut të Beratit, Hiqmet Këlliçin.
Mësohet se Gjykata e Beratit ka pranuar kërkesën e Prokurorisë së Rrethit Berat për marrjen e masën ndaluese ndaj Drejtorit të Burgut të Beratit, Hiqmet Këlliçit, të parashikuar nga Neni 242 i Kodit të Procedurës Penale.
Gjatë seancës së zhvilluar në dhomat e këshillimit, Gjykata e Beratit ka urdhëruar pezullimin e ushtrimit të detyrës së tij si drejtori i IEPV Berat,deri në përfundimin e procesit gjyqësor në ngarkim të tij.
Bëhet me dije se kallëzimi penal ndaj Këlliçit është bërë nga avokati i të burgosurit në 16 Janar 2019.
Në kallzimin penal thuhet se, Këlliçi e ka izoluar të burgosurin Krios Vangjeli nga 13-20 Janar 2019 dhe e ka mbajtur në dhomën e izolimit me pranga, duke e lënë edhe më tej afateve që e lejon ligji.
Në kallzimin penal ndaj Hiqmet Këlliçit, ndër të tjera thuhet se, me urdhër të drejtorit punonjësit e burgut e kanë trajtuar këtë të burgosur në mënyrë çnjerrëzore.
I burgosuri Krios Vangjeli mësohet se është transferuar me urdhër të Këlliçit në fillim të këtij muaji në Repartin e Posaçëm të Burgut të Fierit. Këlliçi e ka apeluar masën ndaluese në Gjykatën e Apelit Vlorë, ndërkohë që e ka lënë detyrën dhe është larguar prej ambjenteve të Burgut të Beratit pasditen e së Enjtes, menjëherë pasi Gjykata e Beratit urdhëroi pezullimin e tij nga detyra.
Në ngarkim të drejtorit të IEPV Berat janë të regjistruara deri më tani në Prokurorinë e Rrethit të Beratit edhe 3 kallzime të tjera penale për “shpërdorim detyre”. Dy kallzime penale janë bërë nga SHÇKB e Burgjeve që e akuzon se favorizonte të dënuarit për “liri me kusht” në këmbim të rryshfeteve, si dhe një tjetër kallzim penal për “Shpërdorim Detyre” është bërë nga disa avokatë të Beratit, që e akuzojnë se ka shkelur të drejtat e avokatëve, duke mos i lejuar për takimet me të paraburgosurit e mbrojtur prej tyre.
/Gazeta Reforma
