Ndërkohë që na ndajnë vetëm katër ditë nga nisja e sezonit të ri televiziv, “Tv Klan” tashmë ka publikuar promon e programeve. Në sy ka rënë mungesa e moderatoreve të njohura, Nevina Shtylla, Marina Vjollca dhe Arjola Shehu.
Ditë më parë, Arjola Shehu u pa në ambientet e televizionit “Top Channel”, ku përflitet se do të nisë një emision të ri. Këtë lajm moderatorja as nuk e mohoi e as nuk e pohoi, duke thënë se “Ndoshta është e vërtetë”.
Mirëpo duket se edhe Nevina Shtylla i ka hedhur sytë drejt këtij televizioni, pasi u la jashtë programacionit të “Klan”. Burime pranë “Express” konfirmojnë se moderatorja e “Jo vetëm modë” është parë pranë ambienteve të këtij televizioni, pasi po tenton të nënshkruajë një kontratë për të sjellë një projekt të ri.
Aktualisht, Nevina Shtylla po prezanton “Maratonën e Këngës” dhe ka udhëtuar në çdo qytet të Shqipërisë gjatë sezonit veror.
