Vetëvrasja e 29-vjeçarit nga Durrësi, i cili u hodh nga kati i tretë i spitalit “Shefqet Ndroqi”, ka tronditur miq e të afërm të tij!
Xhino Koça ishte duke u kuruar të spitali Covid 2, dhe në pak ditë mund t’ia dilte të mposhtte virusin, por i dha fund jetës në mënyrë tepër të dhimbshme.
Për herë të parë në rrjete sociale ka reaguar nëna e tij, stilistja Lira Koça, e cila ka ndarë me ndjekësit një foto të të birit.
Ajo ka njoftuar në emër të saj dhe të bashkëshortit të gjithë miqtë dhe familjarët për vizitat e ngushëllimit për të birin, duke i kërkuar të gjithëve të respektojnë masat anti-Covid.
“Njoftim:
Te dashur Familjare dhe Miq, ne pamundesi per te pritur vizita ngushellimi ne ambjentet e shtepise, per shkak te masave anti-covid,
Ju njoftojme se familja jone ka vendosur qe diten e diele me dat 23.08.2020, ne ambjentet e Bar Oborri (Sheshi Iliria, ne krah te Bashkise Durres) duke filluar nga ora 17:00, te presim vizita, te kryejme homazhe ne kujtim te Xhinos tone…
Lutemi te respektoni te gjithe masat anti-covid duke vendosur maske dhe ruajtur distancat.
Falenderues nese do jeni pjese e kesaj perkujtimore te djalit tone te dashur.
Me rrespekt Edlira dhe Leonard Koça.”
https://www.instagram.com/p/CECAk-3nc2N/
Mikesha e ngushtë e 29-vjeçarit, Ingrid Kau, ka treguar më herët në një intervistë për “Abc News” se Xhino ishte mjaft miqësor dhe aspak i mbyllur në vetvete. Por përgjatë ditëve të fundit ai kishte nisur të tregonte një sjellje më të distancuar me miqtë e tij, duke kthyer mesazhe më shkurt se zakonisht.
“Unë kam qenë kolege në disa punë me Xhinon dhe shokë ndër vite. Dhe kurrë nuk ma ka dhënë përshtypjen e një njeriu me probleme dhe as me depresion apo luhatje humori siç po përshkruhet në disa artikuj. Përkundrazi ishte shumë solar dhe gjithmonë me energji pozitive dhe ndonjë shaka për të hedh.
Thonë që dy ditët e fundit kishte ndryshuar. Nuk po kthente më mesazhe apo nuk po shkruante më aq gjatë sa zakonisht. Xhino mbahej për mesazhe të gjata, ishte më i miri dhe në e-maile dhe nuk përtonte të shkruante. Por dy ditët e fundit ishte mbyllur në vetvete, kishte gjendje ankthi sepse nuk mbushej dot me frymë dhe kishte kapur frika në spital.
Të shtunën ishte shtruar. Akoma nuk kishte mbushur javën. Por ai spitali e ndryshoi totalisht. Po merrte oksigjen sepse nuk mbushej dot me frymë. Nuk kam folur që të kem vënë re diçka. Por kishte folur me njerëz të ndryshëm. Ama Xhino nuk ishte as tipi depresiv, as që bënte diçka të tillë. Prandaj nuk arrij ta besoj dot. Mami i tij ishte testuar dhje kishte dalë negative. Për të tjerët nuk kam dijeni”- ka rrëfyer ajo.
