Detaje të reja janë publikuar në lidhje me vetëvrajen e 29-vjeçarit të infektuar me COVID-19, i cili u vetëhodh nga kati i tretë i Sanatoriumit.
Viktima Xh.K. mësohet se ishte në prag të shërimit sipas News 24 dhe i kishin mbetur shumë pak ditë në spital. Ai nuk kishte pasur komplikacione, ndërsa ishte shtruar rreth 7 ditë më parë në spital.
“Ai trajtohej me shumë pak oksigjen, 3-4 litra, pra në minimunimin e mundshëm të oksigjenimit të pacientëve. Ishte një pacient që po dilte nga spitali dhe ende nuk dimë arsyet e vërteta se pse ky 29-vjeçar i cili nuk kishte komplikacione të tjera është shtyrë drejt vetëvrasjes. Pacienti ka qenë duke marrë mjekimin në momentin kur ka ndodhur ngjarja. I është bërë një injeksion dhe do të merrte sasinë e serumit”, raporton gazetari Erjon Skëndaj.
Nuk dihen ende arsyet që e shtynë të riun t’i jepte fund jetës, por mundësia nuk përjashtohet që ai të ketë qenë në kushte të rënduara psikologjike.
Në njoftimin e saj, policia nuk jepte detaje për ngjarjen e rëndë, ndërsa theksonte se vijojnë hetimet për zbardhjen e plotë të rrethanave që e shtynë të riun të ndërmerrte aktin ekstrem.
