Një pacient i prekur nga koronavirusi është hedhur nga ballkoni i spitalit Infektiv dhe është në gjendje kritike për jetën. Është mësuar se ai është hedhur nga kati i dytë dhe se kishte disa ditë i shtruar në spital.
Policia ka bërë të ditur se ngjarja e rëndë ka ndodhur rreth orës 12:30 dhe pacienti quhet Reshat Grendi 69 vjeç. QSUT-ja deklaroi se mjekët po përpiqen ta shpëtojnë, ndërsa ministrja Manastirliu shtoi se nuk i ka munguar ndihma mjekësore, por nuk dinë çfarë e ka shkaktuar pacientin të kryejë këtë akt.
Së fundmi, Dosja.al raporton se gruaja e Grendit nuk ka ende dijeni për lajmin. Ajo nuk ka ndezur as televizorin për shkak të një fatkeqësie që u ka ndodhur një javë më parë dhe po mbajnë zi si familje.
Megjithatë për mediat ka folur një i afërm i pacientit, i cili ka treguar se ende nuk kanë marrë vesh detaje në lidhje me ngjarjen. Ai tregon se Grendi ishte nisur ditën e djeshme në spital ndërsa shton se vjen nga një familje e qetë pa probleme ekonomike dhe familjare.
Sipas të afërmit, problemi qëndron në Tiranë, dhe aty i kanë bërë diçka 69-vjeçarit, sepse askush nuk e dinte që ai ishte i infektuar me Covid-19.
“E kam kushëri të dytë. Dje iku në spital dhe e çuan me ambulancë direkt për Tiranë. U habitëm sepse ishte në rregull. Vetëm kishin pension me të shoqen. Ne nuk morëm vesh që ishte i prekur. Dje e morëm vesh. Ai ishte shumë njeri i mirë dhe i rregullt. Nuk kishte probleme ekonomike. E shoqja është vetëm aty. Nuk e di nëse ka njeri tjetër apo jo. Në shtëpi është ajo. Ka marrë mjekim edhe në spital ai. Nuk e dinim se ishte me Covid. Dje e kishin çuar në Tiranë. Me sa di nuk kishte sëmundje tjetër. Ai ishte i rregullt. Nuk kishte probleme as ekonomike asgjë. Nuk e di se çfarë medikamenti i kanë dhënë doktorët. Për atë mbajnë përgjegjësi ata. Kishte 4 ditë që ikte dhe vinte në spitalin e Fierit, nga aty në Tiranë, por nuk ishte rëndë. Dje shkoi në Tirane, ndërsa sot u hodh, s’e besojmë dot. Njeri i rregullt, pa probleme ekonomike. Nuk dimë çfarë ka ndodhur, po ngremë supet përpjetë, nuk e kuptojmë pse. Familja e tij është në zi, përpara 1 jave patën një vdekje dhe nuk e ndezin televizorin. Ishte njeri me ekonomi të mirë, fëmijët i kishte në emigracion. Ishte mirë kur shkoi në Tiranë, diçka i bënë aty, problemi është në Tiranë,”- është shprehur ai.
Ky është rasti i katërt i hedhjes nga lartësia të personave me Covid-19. Tre rastet e para kanë rezultuar fatale për jetën. Dy prej të sëmurëve janë hedhur nga spitali “Shefqet Ndroqi”, kurse një tjetër u hodh nga banesa e tij në Tiranë.
Rasti i parë është regjistruar më 13 gusht, ku 29-vjeçari Xhino Koça nga Durrësi u hodh nga kati i tretë i “Shefqet Ndroqit” në gjendje të rënduar psikologjike, ku për pasojë ndërroi jetë.
Ndërkohë, që në 2 shtator Hasan Mira, 65 vjeç, i dha fund jetës duke u hedhur nga kati i katërt i COVID 2 vetëm dy ditë pasi ishte shtruar aty.
Rasti i tretë ishte ai i Preng Gjonajt, 52 vjeç, me origjinë nga Tropoja e me banim në Tiranë, u regjistrua në 1 nëntor sërish tek Sanatoriumi.
