Reperi i njohur R. Kelly nuk është përmbajtur dot gjatë një interviste për “CBS News” të martën, pasi mohoi me zemërim akuzat se ka përdhunuar vajza të mitura.
Ai u ngrit në këmbë dhe nisi të bërtiste se nuk është fajtor:
“Boll luajtët, unë nuk i kam bërë këto gjëra”, tha reperi.
“Ky nuk jam unë. Jam duke luftuar për jetën time”, vijoi ai.
Fotot e R Kelly-t i ngritur në këmbë duke folur i inatosur me gjeste po bëjnë namin në rrjetet sociale.
Reperi madje është dashur të mbahej për krahu nga një tjetër person që të mos rrëmbehej më shumë seç duhej.
Kelly u akuzua më 22 shkurt nga një gjykatë në Çikago për abuzim seksual ndaj katër vajzave, tre prej të cilëve ishin të mitura në kohën kur kanë ndodhur ngjarjet.
Nëse dënohet, ai mund të përballet me një dënim maksimal prej 70 vjetësh – 7 vjet për çdo akuzë.
“Njerëzit po shikojnë të kaluarën time. Ata po shikojnë të kaluarën dhe po tentojnë të shtojnë gjëra që nuk ekzistojnë”, u shpreh ai.
Kelly iu dorëzua drejtësisë pasi u parashtruan 10 akuzat për abuzim por u lirua pasi kaloi fundjavën në burg dhe pagoi 100 mijë dollarë për t’u gjykuar në liri.
