Ermal Hoxha, bashkëshorti i këngëtares Rezarta Shkurta, është liruar nga burgu.
Burime për ‘Shqiptarja.com’ bëjnë me dije se nipi i ish-diktatorit Enver Hoxha, ka lënë qelinë e burgut të Fierit tre ditë më parë teksa i kishte mbetur edhe 1 vit e 8 muaj burg.
Ai u lirua me kusht dhe gjatë kësaj kohe Ermal Hoxha nuk duhet të kryejë asnjë vepër penale dhe nuk duhet të shoqërohet me persona të inkriminuar.
Hoxha u dënua nga Gjykata e Krimeve të Rënda në korrik të 2017 me 10 vite burgim, së bashku me anëtarët e tjerë të grupit ‘Xibraka’. Nga gjykimi i shkurtuar dënimi zbriti në 6 vite dhe 8 muaj burgim.
Nipi i Enver Hoxhës u arrestua gjatë një aksioni ndërkombëtar i cili zbuloi laboratorin e parë të drogës në vendin tonë në fshatin Xibrakë 10 km larg qytetit të Elbasanit. Operacioni ‘Xibraka’ u zhvillua katër vite më parë në Elbasan, ku më 14 janar të 2015, në pranga ranë 11 persona mes tyre dhe 2 kolumbianë të cilët sipas hetimeve merreshin me përpunimin e kokainës dhe pse në Shqipëri e kishin mbërritur me leje pune dhe si futbollistë.
