Gjykata e Elbasanit ka vendosur masën e “arrest me burg” për dy nga tre pedagogët e Universitetit “Aleksandër Xhuvani”, të cilët u arrestuan nën akuzat e korrupsionit.
Trupi gjykues la në burg Albert Riska 55 vjeç, Dekani i Fakultetit të Shkencave Humane në Universitetin “Aleksandër Xhuvani” në Elbasan, arrest me burg 60 ditë për Elvira Lumin 54 vjeçe shefe e Departamentit të Gazetarisë në Fakultetin e Shkencave Humane në këtë Universitet si dhe arrest shtëpie për Erjola Calja, 29 vjeçe, pedagoge e jashtme në Fakultetin Ekonomik.
Ndërkohë edhe për Petrit Kodra, 53 vjeç i dyshuar si sekser dhe për studentin Marius Calja është vendosur masa e arrest me burg.
Sakaq, Gjykata e Elbasanit vendosi masën e “arrest shtëpie” për Admirim Kala 31 vjeç dhe Adem Ngjela 51 vjeç, edhe këta të dyshuar e kryenin rolin e sekserit mes studentëve dhe pedagogëve për marrjen kundrejt pagesës së notave kaluese në provime.
Tre petagogët, katër sekserë dhe një student u arrestuan dy ditë më parë pasi akuzohen se kanë marrë para në këmbim në notës kaluese në Universitetin “Aleksandër Xhuvani”, shkruan “Balkanweb”.
Personat e arrestuar në bashkëpunim me njeri-tjetrin në kohë të ndryshme, kanë shpërdoruar funksionin publik kanë kërkuar dhe kanë ushtruar ndikim të paligjshëm në rolin e sekserit dhe pedagogut në Universitetin “Aleksandër Xhuvani” Elbasan për marrjen e notave kaluese nga studentet gjatë sezoneve të provimeve. Shuma që paguanin studentët ishte deri në 30 mijë lekë të reja.
