Është vënë në pranga autori i vrasjes së kunatës Enkeleda Çapoku mbrëmjen e djeshme në Paskuqan.
Krimi i rëndë ndodhi në banesën e 30-vjeçares, ku kunati i saj hyri me dhunë pas konflikteve që kishin pasur prej muajsh.
Ai është ndaluar tek karburanti me kupolë në zonën e Laprakës në kryeqytet raporton Gazeta Reforma.
34-vjeçari ia mbathi menjëherë pas krimit nga shtëpia në Paskuqan. Erëdet Çapoku po lëvizte me biçikletë në momentin kur u prangos.
Çapoku nuk ia falte kunatës faktin që e kishte nxjerrë nga shtëpia dhe e përndiqte gjatë gjithë kohës, duke i bërë edhe fotografi.
Fotot më pas ai ia dërgonte të vëllait, i cili ndodhet në burg për drogë.
Nisur nga kjo situatë, viktima e kishte denoncuar kunatin për përndjekje, ndërsa kishte marrë edhe urdhër-mbrojtje.
Çapoku e kishte kërcënuar bashkëshorten e vëllait se do ta vriste nëse nuk tërhiqte denoncimin.
Ndaj mbrëmjen e djeshme ai hyri me dhunë në banesën e saj dhe e vrau me gjakftohtësi në sy të vajzës dhe nënës së viktimës.
