Ndërsa syte e botës ishin kthyer nga Kapela Sistine në pritje të tymit të bardhë – simbolit të zgjedhjes së Papës së ri – një tjetër tym, këtë herë rozë, u ngrit në horizontin e Romës, nga një kodër pas Vatikanit. Ishte kjo një formë proteste nga organizata katolike “Konferenca për Ordinimin e Grave”, që denoncoi në këtë mënyrë pabarazinë gjinore në Kishë dhe përjashtimin e grave nga hierarkia dhe konklava.
“Ndërsa bota pret tym të bardhë ose të zi, tymi ynë rozë është një sinjal që gratë duhet të jenë të përfshira në çdo aspekt të jetës kishtare,” u shpreh Kate McElwee, drejtoreshë ekzekutive e organizatës, duke theksuar se “vendi i një gruaje është në konklavë.”
Por ndërsa protestueset mbanin pankarta me emrat e grave që, sipas tyre, mund të ishin kandidate të denja për papë – përfshirë ish-presidenten e Irlandës Mary McAleese – një pjesë e publikut nuk e priti mirë këtë lëvizje.
Reagimet online nuk kanë munguar. Disa përdorues kanë shprehur indinjatën, duke thënë se nëse këto gra do të ishin vërtet besimtare katolike, nuk do të guxonin të ndërmerrnin një akt të tillë sfidues ndaj një prej traditave më të shenjta të Kishës.
Vetë protestueset justifikuan vendimin për ta zhvilluar demonstratën nga kodra Gianicolo – e cila ka pamje direkte mbi Bazilikën e Shën Pjetrit – duke thënë se janë arrestuar më parë kur janë përpjekur të protestojnë më pranë Vatikanit.
Në një intervistë për France 24, Mary McAleese paralajmëroi se zgjedhja e një pape konservator do e kthente Kishën pas në kohë. Ajo theksoi se, ndonëse Papa Françesku nisi disa hapa drejt përfshirjes dhe reflektimit, tema e barazisë gjinore vijon të “shtyhet për më vonë”.
Në fund, ajo u shpreh: “Na duhet një burrë me guxim të vërtetë për të çuar Kishën drejt barazisë që vetë Krishti e përfaqëson, por që Kisha nuk e pasqyron.”
