Nuk ka kaluar ende java që kur u transmetua për herë të parë emisioni “Klanifornia” në TV Klan, nën drejtimin e Marina Vjollcës dhe menjëherë kanë plasur kritikat publikisht.
Këtë herë ka qenë moderatorja Liberta Spahiu e cila ka publikuar një shkrim të “Prive.al”, që e trajton emisionin si “turp” dhe rezultatin e tij si “një zero me bisht” në artikullin e titulluar: “Skandaloze: Si përbuzen luftëtarët kosovarë në ‘Klanifornia’?”
Liberta madje e ka shoqëruar reagimin e saj me një emoji që duket se tregon se për të, emisioni ishte i neveritshëm.
Në shkrim nuk kursehen kritikat për skenografinë që thuhet se është një kopje e “Portokallisë” dhe sigurisht, Marinën për të cilën thuhej se nuk ka ndryshuar taktikë nga “C’est la vie’”:
“Premiera e programit ishte zhgënjim për shikuesit nga të gjitha detajet. E para, skenografia e cila ngjante në Portokallinë e 15 viteve më parë. Me një ndriçim të zbehtë, të qeshurat e shtuara në montazh, ‘Klanifornia’ ngjante në gjithçka përpos një programi humori që synon të përçojë gjallëri. Kritikat u rikthyen edhe për Marinën në vazhdën e të njejtave me ato të ‘C’est la vie’”, thuhet në shkrim.
Më tej trajtohet skenari i përgatitur nga Delinda Disha e cila vinte nën rolin e Shote Galicës dhe duke folur gegërisht:
“E ‘qershia mbi tortë’ ishte njëri prej skeçeve debutuese të aktores Delinda Disha. Shkëlqimi i ndërtuar ndër vite në programin tjetër ku asnjë fjalë nuk lejohet të thuhet rastësisht u ‘zhvesh’ që në paraqitjen e parë me rolin skandaloz të Shotë Galicës. Në një prej pjesëve të rolit, Delinda e cila në tentativën e saj amatoreske për të kopjuar të folurën gegërishte të kosovarëve ngjante në një serbe që tenton të flasë shqip përbuzi luftën e Ushtrisë Çlirimtarë të Kosovës”.
Por çfarë fshihet në të vërtetë pas këtij artikulli?
Është e sigurt që kjo kritikë i drejtohet emisionit dhe veçanërisht rolit të Delindës që është diskutuar shumë në rrjetet sociale.
Por nuk mund të anashkalojmë faktin që këto kritika vijnë nga vetë ish-e dashura e reperit Getoar Selimi, që është Liberta Spahiu.
Për të gjithë ju që nuk e dini, sot reperi Getoar Selimi është lumturisht i martuar me moderatoren Marina Vjollca, por para saj ai ka pasur një lidhje vërtet serioze me një tjetër moderatore, Liberta Spahiun.
Gjithçka u konfirmua pas ndarjes, kur më në fund Liberta tregoi edhe arsyen se pse i dha fund lidhjes së saj me reperin. Moderatorja tha se kishte pasur probleme dhe mosmarrëveshje me Getoarin për shkak të punës së saj si gazetare: “Unë më shumë e dua punën time se gjithçka tjetër”.
Por pavarësisht sesi përfunduan gjërat mes tyre, nuk duhet të lëmë pa përmendur faktin që Liberta deri më sot nuk ka shprehur asnjë lloj qëndrimi ndaj çiftit, as kur Marina me Getoarin kurorëzuan dashurinë e tyre, madje ajo transmetoi dasmën në emisionin “Prive”.
Të jetë kjo një kritikë e Libertës vetëm ndaj emisionit?!
