Nëse do të flisnim për në Shqipëri, me siguri do t’ju vinte çudi nëse do të dënoheshit me 3 mijë euro gjobë për marrjen e një sasie të vogël rëre në plazh.
Epo kjo nuk është aspak për të qeshur në Sardenjë, ku dy turistë shqiptarë janë ndaluar nga policia italiane.
Babë e bijë ishin drejtuar në portin Olbia Isola Bianca, në momentin kur autoritetet italiane konstatuan se në valixhen e tyre kishte një sasi prej një kilogrami rëre të paketuar në dy shishe uji gjysmë litre dhe një qese plot me guaska.
Pas kërkimeve, kjo rërë rezultoi se ishte marrë nga plazhet Gallura, në Sardenjë ku është e ndaluar të marrësh rërë.
Babë e bijë po hynin në traget për të shkuar në Genova kur u ndaluan. Ata nuk ishin në dijeni të këtij ligji dhe tani rrezikojnë të marrin një gjobë prej tre mijë eurosh.
Autoritetet italiane kanë vënë masa gjobe deri në 3 mijë euro për të gjithë pushuesit që marrin qoftë edhe pak rërë nga plazhi, pasi vitet e fundit është bërë një fenomen mjaft shqetësues.
