Donald Trump, ka firmosur Urdhrin Ekzekutiv 14161, i cili vendos ndalime të reja udhëtimi për qytetarët e afro 20 shteteve që cilësohen si me rrezik të lartë për terrorizëm, keqpërdorim të vizave dhe bashkëpunim të dobët në çështje sigurie.
12 shtete përfshirë Afganistanin, Iranin, Libinë, Somalinë dhe Jemenin janë ndaluar plotësisht nga hyrja në SHBA, ndërsa 7 shtete të tjera, si Venezuela, Kuba dhe Laosi, përballen me kufizime të pjesshme.
Trump e lidhi këtë vendim me sulmin terrorist të ndodhur së fundmi në Boulder, Colorado, duke thënë se masat janë të domosdoshme për të mbrojtur qytetarët amerikanë nga individë të rrezikshëm që shpesh qëndrojnë përtej afatit të vizave të përkohshme.
Sipas zëdhënëses së Shtëpisë së Bardhë, Abigail Jackson, ky vendim është një “masë e arsyeshme”, që synon vendet që nuk përmbushin standardet minimale të sigurisë.
Trump shtoi se masa të tilla gjatë mandatit të parë ndihmuan në parandalimin e sulmeve terroriste dhe zotohet se do të vazhdojë t’i japë përparësi sigurisë kombëtare.
Ndërkohë, kritikët e shohin vendimin si të rrezikshëm dhe me ndikim të diskutueshëm, ndërsa mbështetësit thonë se është një hap i nevojshëm për të mbrojtur SHBA-në.
