Një ngjarje e rëndë ka tronditur këtë mëngjes qytetin e Shkodrës. Një grua me shtetësi amerikane është gjetur e pajetë në një banesë të marrë me qira në lagjen Gjuhadol, pasi dyshohet se është vrarë me thikë nga bashkëjetuesi i saj, gjithashtu amerikan.
Ngjarja ka ndodhur rreth orës 10:15 në rrugën “At Shtjefën Gjeçovi”. Burime nga policia bëjnë me dije se autori i dyshuar ndodhej në gjendje të dehur në momentin e krimit dhe pas aktit, ka tentuar të dëmtojë veten me mjet prerës, duke pësuar plagë të lehta në duar.
Ai është transportuar menjëherë në spital për ndihmë mjekësore, ndërsa ndodhet nën mbikëqyrjen e autoriteteve.
Ndërkohë, grupi hetimor dhe Prokuroria kanë nisur punën për zbardhjen e plotë të rrethanave të ngjarjes, që ka tronditur banorët e zonës dhe më gjerë.
Ky rast rikthen vëmendjen mbi sigurinë e të huajve që vizitojnë apo jetojnë përkohësisht në vend, si dhe mbi problemet e dhunës në marrëdhënie.
