Një aksident me pasojë vdekjen e një fëmije 12-vjeçar ka tronditur opinionin publik në Bruksel këtë fundjavë. Ngjarja e rëndë ndodhi të dielën pasdite në komunën Ganshoren, ku një automjet policie u përplas me një djalë që po lëvizte me një skuter elektrik.
Sipas njoftimit zyrtar nga Prokuroria e Brukselit, aksidenti u shënua rreth orës 17:50 dhe viktima është një fëmijë i lindur në vitin 2013. Edhe pse ekipet e emergjencës mbërritën menjëherë në vendngjarje dhe tentuan të shpëtonin jetën e tij, 12-vjeçari nuk arriti t’u mbijetonte plagëve të marra.
Detajet mbi mënyrën sesi ndodhi aksidenti ende nuk janë bërë të qarta, ndërsa autoritetet belge kanë nisur hetimet për të sqaruar nëse veprimet e policisë në atë moment ishin të arsyetuara apo në shkelje të protokolleve.
Lajmi ka ngjallur reagime të shumta në rrjetet sociale dhe mediat lokale, duke risjellë në vëmendje çështjen e sigurisë në ndjekjet policore dhe përdorimin e automjeteve të shpejtësisë së lartë në zona të banuara.
