Një atentat me armë zjarri është regjistruar pasditen e sotme në Berat. Ngjarja ka ndodhur në fshatin Dushnik, ku persona të paidentifikuar kanë qëlluar me armë zjarri drejt një 46-vjeçari, i cili ishte në lëvizje me mjetin e tij. Fatmirësisht ai u ka shpëtuar të shtënave. 46-vjeçari, banues në Berat është një person i njohur për Policinë, pasi figuron person me precedent të mëparshëm kriminal. Pas të shtënave Policia e Beratit njofton se ka gjetur mjetin e djegur të autorëve në fshatin Kozare. Autorët dyshohet të jenë nga Fieri dhe po punohet për kapjen e tyre.
Njoftimi policisë:
Rreth orës 16.10, në rrugën e fshatit Dushnik, është qëlluar me armë zjarri në drejtim të automjetit që drejtohej nga shtetasi A. H, 46 vjeç, banues në Berat, person me precedent të mëparshëm kriminal. Nga të shtënat nuk ka persona të lënduar. Menjëherë në vendngjarje kanë shkuar shërbimet e Komisariatit të Policisë Berat, Forcat Operacionale dhe ato Shqiponja të DVP Berat dhe drejtuesit e Drejtorisë Vendore të Policisë Berat. Njëkohësisht është ngritur grupi hetimor nën drejtimin e Prokurorisë i cili ndodhet në vendngjarje.
Nga veprimet e shpejta dyshohet se autorët janë nga qarku Fier dhe për këtë janë angazhuar në veprimeve operacionale dhe shërbimet e Drejtorisë Vendore të Policisë Fier dhe Komisariateve në varësi të saj. Për arsye hetime nuk jepen të dhëna të tjera. Vijojnë veprimet hetimore dhe operacionale nën drejtimin e Prokurorisë për të bërë të mundur zbardhjen dhe dokumentimin e plotë ligjor të këtij rasti.
