David Beckham dhe djali i tij Brooklyn i shpëtuan për mrekulli një aksidenti nga i cili automjeti i tyre u shkatërrua thuajse plotësisht. Ish-futbollisti pranoi se ishte faji i tij dhe se kishte bërë një lëvizje të gabuar.
Fotografitë shfaqin automjetin “Audi RS6” i dëmtuar rëndë në anën e shoferit, ndërsa makina tjetër e dëmtuar më pak. Ish-kapiteni i Anglisë kishte shkuar për të marrë nga trajnimi djalin e tij të madh të shtunën, kur aksidenti ndodhi.
Beckham, 39 vjeç, kishte qenë në qendrën e trajnimit të Arsenalit në London Colney, Hertfordshire për të parë djalin e tij të madh në ndeshjen kundër Brighton.
Ish-mesfushori i Real Madridit dhe Manchester United thuhet se është trajtuar në vendin e ngjarjes për dëmtime të vogla në shpatullën e tij, ndërsa Brooklyn është shëndoshë e mirë.
