Një ngjarje e rëndë ka tronditur Prizrenin në orët e para të mëngjesit të së martës. Një 44-vjeçar, shtetas turk me banim të përkohshëm në Kosovë, ka sulmuar me thikë dy vajzat e tij të mitura, duke shkaktuar vdekjen e 15-vjeçares dhe duke plagosur rëndë motrën e saj 11-vjeçare.
Sipas njoftimit të Policisë së Kosovës, ngjarja ka ndodhur rreth orës 05:57 në rrugën “Shote Galica”. Në vendin e ngjarjes kanë ndërhyrë katër patrulla policore, pasi u raportua se personeli mjekësor nuk mund të ofronte ndihmën për shkak të pranisë së të dyshuarit me thikë në dorë.
Përveç vajzave, edhe bashkëshortja e autorit të dyshuar ka pësuar lëndime, ndërsa 11-vjeçarja ndodhet në gjendje të rëndë në Qendrën Klinike Universitare të Kosovës në Prishtinë. I dyshuari, i identifikuar si M.G., pas aktit ka tentuar të vetëlëndohet dhe aktualisht ndodhet nën trajtim në Spitalin Rajonal të Prizrenit.
Policia ka konfirmuar se ai është arrestuar dhe hetimet janë duke vazhduar për të zbardhur rrethanat e plota të ngjarjes.
