Një ngjarje tejet e rëndë ka ndodhur në zonën e Menidit në Greqi, ku një vajzë 14-vjeçare me origjinë shqiptare është dhunuar brutalisht nga e ëma, duke përjetuar pasoja tragjike. E mitura ishte shtatzënë dhe dhuna e ushtruar ndaj saj çoi në një abort spontan.
Sipas raportimeve të medias greke protothema.gr, nëna 54-vjeçare, për arsye ende të paqarta, ka ushtruar dhunë të fortë fizike ndaj vajzës së saj. Goditjet e shumta kanë shkaktuar humbjen e menjëhershme të shtatzënisë, duke lënë adoleshenten në një gjendje të rëndë fizike dhe psikologjike.
Ngjarja mori një kthesë edhe më të rëndë kur vajza, e traumatizuar dhe pa asnjë mbështetje, u paraqit në komisariat duke mbajtur fetusin në një qese. Menjëherë pas kësaj, policia arrestoi nënën 54-vjeçare për lëndime të rënda trupore dhe dhunë në familje.
Autoritetet greke po hetojnë motivet e këtij akti ekstrem, ndërsa vajza është dërguar në Departamentin e Fëmijëve për kujdes mjekësor dhe mbështetje psikologjike. Mjekët dhe specialistët e shëndetit mendor pritet të vlerësojnë gjendjen e saj pas traumës së rëndë të përjetuar.
Ngjarja ka tronditur opinionin publik në Greqi dhe komunitetin shqiptar, duke rikthyer vëmendjen te rastet e dhunës ekstreme brenda familjes dhe mbrojtja e fëmijëve në situata të rrezikshme.
