Një ngjarje tronditëse është zbardhur sot nga policia, e cila ka vënë në pranga një 35-vjeçar të identifikuar me emrin Jetnor Zhaboli. I riu me profesion ekonomist akuzohet se ka mbajtur peng në banesë familjarët e tij, nënën, bashkëshorten dhe vajzën e mitur.
Hetimet kanë zbuluar se, kryefamiljari sa herë largohej nga banesa u ndërpriste atyre çdo lloj komunikimi me persona të tjerë. Madje ai ka ushtruar dhunë fizike dhe psikologjike në mënyrë të vazhdueshme ndaj bashkëshortes së tij. Mësohet se prej fillimit të marrëdhënies, Zhaboli ka qenë xheloz dhe kontrollues, por me kalimin e kohës u bë edhe me shumë.
Për t’i patur nën kontroll gjatë gjithë kohës që ishte në lëvizje, 35-vjeçari kishte instaluar kamera në çdo cep të banesës madje edhe në dhomën e gjumit dhe në tualet dhe i monitoronte nga celulari. Hetimet gjithashtu kanë zbuluar se, ai kishte montuar bllokues valësh që familjaret të mos bënin telefonata të pa kontrolluara.
Kjo mënyrë jetese i kishte shkaktuar ankth bashkëshortes së tij e cila kishte tentuar vetëvrasjen. Në banesë policia gjeti dy letra që gruaja kishte shkruar për familjaret e saj, ku iu linte lamtumirën dhe u kërkonte falje.
