Një vrasje e rëndë ka ndodhur ditën e sotme në qytetin e Pejës. Burri ka vrarë gruan e tij në banesën e tyre. Personi i dyshuar për vrasjen e gruas së tij është Edmond Lajqi, ndërsa viktima është identifikuar si Gjyleta Ukella-Lajqi.
Çifti dyshohet se kanë pasur raste të dhunës në familje që janë raportuar te organet e rendit. Mediat në Kosovë raportojnë se Lajqi u dorëzua vetë në Polici dhe raportoi për krimin ndaj bashkëshortes së tij. Lajqi në vitin 2021 sipas raportimeve, ishte dënuar me 400 euro gjobë për dhunë në familje.
Kryeprokurori i Pejës Agim Kurmehaj konfirmoi se viktima është vrarë me armë zjarri dhe që i dyshuari është arrestuar.
“Unë isha në vend të ngjarjes aty është edhe prokurori kujdestar dhe zëvendësi edhe vetëm e kemi informatën se burri se ka vra gruan. Burri është arrestuar dhe revolja me të cilën është kryer vepra penale është sekuestruar. Për informata tjera do t’ju mbajë të informuar me kohë”, konfirmoi kryeprokurori.
Në një njoftim në Facebook, Drejtoria e Shëndetësisë dhe Mirëqenies Sociale në Pejë, shpreh ngushëllimet, ndërsa e cilësojnë viktimën si një grua punëtore dhe të urtë. Gjyljeta punonte si asistente në stomatologji, prej 20 vitesh.
“Të tronditur thellë nga vrasja makabre e koleges tonë, punëntores shëndetësore te stomatologjisë të ndjerës Gjyljeta Ukella. E ndjera Gjyljetë per dy dekada shërbeu si asistente e stomatologut në Poliklinikën Stomatologjike në Pejë. Do të mbetet ne kujtimet e secilit koleg për punën dhe dhe urtësinë që e ka karakterizu përsonalitetin e Gjyljetes. U prehshë në parajs!“, thuhet në njoftim.
Ky është rasti i dytë në Kosova brenda disa ditëve. Disa ditë më parë Valon Aliu ka vrarë ish-bashkëshorten e tij Erona Cokli, shkak u bë kujdestaria e fëmijës.
