Prej ditës së premte të javës së kaluar është zhdukur pa asnjë gjurmë aktorja me origjinë shqiptare që është bërë e njohur me filmin “All or nothing”, Adea Shabani.
Prej dy vjetësh 25-vjeçarja ishte vendosur në Los Angeles duke punuar për të ndjekur ëndrrën hollivudiane. Ajo studionte në Los Angeles për aktrim dhe miqtë e saj filluan të shqetësoheshin kur ajo nuk kishte shkuar më në mësim.
Sipas miqve të saj të ngushtë ata e kishin gjetur të hapur derën e shtëpisë së saj dhe hera e fundit kur u pa ishte më 23 shkurt afër bllokut 1700 në Wilcox Avenue, disa blloqe afër Teatrit të Famshëm Kinez në mes të Hollywood-it, jo shumë larg vendit ku ajo banonte.
Familja është alarmuar nga kjo zhdukje e papritur e vajzës së tyre dhe kanë bërë denoncimin në organet kompetente, ndërkohë kanë punësuar edhe hetues privat për të gjetur vajzën e tyre. Ditët po kalojnë dhe ende nuk ka asnjë shenjë nga Adea dhe familja e saj po ndihet gjithmonë e më e dëshpëruar dhe ka kërkuar ndihmën e të gjithëve.
“Diçka po ndodh me të. Ne nuk e dimë ku është. Shpresojmë të jetë gjallë”, është shprehur mikesha e Adeas, Emma Joe.
