Rindërtimi i hekurudhës Tiranë Durrës dhe ndërtimi i aksit të rri hekurudhor Tiranë-Rinas pritet të përfundojë në dhjetor 2020. Gjatë diskutimit të projektligjit për financimin e rehabilitimit të linjës ekzistuese hekurudhore, zv. ministri i Infrastrukturës dhe Energjisë Artan Shkreli, tregoi se po diskutohet që çmimi i biletës së udhëtimit, të jetë midis 1 -1.2 euro.
“Ndodh që bileta, pavarësisht se nuk është përcaktuar, është shumë e saktë në përgatitjen e fizibilitetit të lëvizjes së njerëzve, do luhatet midis 1 euro dhe 1.2 pak a shumë. Pse nuk është përcaktuar kaq saktë nga ne është fakti që i përgjigjet dhe pyetjes tjetër që operatorët do të jenë të hapur, pra do të jenë operatorë publikë, mund të jenë edhe operatorë privatë, sikurse ekziston edhe mundësia e kombinimit të operatorëve”, – tha Shkreli.
31.12.2020 është data e caktuar si afati i përfundimit të punimeve, por sipas zv. ministrit të Infrastrukturës dhe Energjisë, mund të zgjasë disa muaj më shumë për shkak të linjës së Rinasit.
“Deri vitin tjetër, pra bëhet fjalë për 24 muaj, është plotësisht e realizueshme sepse bëhet fjalë për rehabilitim. Ne mendojmë që do arrijmë ta realizojmë këtë datë , e vetmja gjë që mund të ketë pikëpyetje do të jetë trakti i ri i cili do të shkojë deri në Rinas. Pavarësisht se janë bërë studimet, gjatë punës mund të ketë pikëpyetje që mund ta shtyjnë atë pjesë të hekurudhës brenda targetit mujor”, sqaroi Shkreli.
Referuar projektit, lokomotiva e re do të jetë me diesel, ndërkohë që për lokomotivën elektrike kërkohen edhe 10-12 mln euro shtesë.
Burimi: Panorama
