Është e sigurt, kjo verë do të jetë shumë e nxehtë dhe fajin për këtë, përveç temperaturave do ta kenë klipet e reja që janë publikuar nga artistët shqiptarë.
Soni Malaj publikoi dje këngën e saj më të fundit “Loca”, videoklipi i së cilës është realizuar në Locorotondo të Italisë. Ritmi dhe muzika e saj verore, i japin shumë mundësi këngës që të jetë një hit i vërtetë muzikor gjatë verës.
Soni gjithashtu duket e mahnitshme me look-n në klip për të cilin është kujdesur me mjeshtëri Joni Peçi. Ajo që spikati në klip ishin tendencat më të fundit të modës, përfshi këtu frudat, thekët, flokët e gjatë dhe fijet blu si dhe një sërë trendesh që mund t’i shihni më poshtë:
Veshjet
Veshjet me fruda dhe thekë janë trendi më i njohur i këtij sezoni, që lidhet me vitet ’70. Mund të jetë ndoshta sezoni i dytë që frudat janë përfshirë në koleksionet e modës së lartë. Me një bluzë crop-top të bardhë, te Soni shohim të ndërthurur mëngët e gjera me fruda dhe thekët që varen poshtë në pantallonat e shkurtra me prehër të gjatë.
Flokët
Flokët e gjatë janë një nga trendet e momentit sjellë nga femra të njohura të showbiz-it të huaj. Rihanna, Kim Kardashian, Naomi Campbell etj, janë disa nga emrat e njohur që po e ndjekin këtë trend, tashmë të mbërritur edhe në vendin tonë. Gjithashtu flokët ombre me fije blu, janë të preferuarat e këtij sezoni dhe do të bëhen edhe tuajat nëse shihni këto foto. Megjithëse flokët e saj janë të shkurtër, Soni i risjell falë flokëve me zgjatim që i rrinë shumë bukur.
Ngjyrat
E verdha mustardë, e kuqja, e bardha dhe bluja janë katër ngjyrat që do të mbizotërojnë këtë verë. Pantallonat e gjera me prehër të lartë janë ndër veshjet që duhet t’i keni në garderobë këtë verë për t’u rezistuar temperaturave por edhe për të qenë chic. Nuk duhet të harroni edhe veshjen tuaj në plazh. Soni sjell fustanin rrjetë blu që i rri shumë mirë dhe i shfaq linjat seksi.
Aksesorët
Syzet me ngjyrë dhe bizhuteritë e floririt mbizotërojnë edhe këtë vit. Aksesorët që nuk të zhgënjejnë kurrë janë ato që i japin shkëlqim paraqitjes suaj dhe Soni e provon këtë më së miri.
Burimi: Iconstyle.al
