Një ndër shkaqet kryesore të aksidenteve, vijon të jetë përdorimi i celularit gjatë drejtimit të makinës.
Pikërisht për këtë arsye, Policia Rrugore ka kërkuar që gjoba të pesëfishohet, pasi krahasuar me rrezikun që paraqet vlera e saj është krejtësisht qesharake.
Momentalisht, gjoba për këtë shkelje është nga 1.000 lekë deri në 1.500 lekë. Policia Rrugore ka kërkuar që në ndryshimet që do të bëhen në Kodin Rugor, gjoba të prekë shifrën prej 5.000 lekë deri në 15.000 lekë, e njëjta masë si për mosvendosjen e rripit të sigurimit.
Gjithashtu, sipas “Top Channel” është parashikuar edhe një masë tjetër plotësuese. Në rast se një drejtues mjeti do të gjobitet tri herë brenda një viti për përdorimin e celularit, atij do t’i pezullohet leja e drejtimit për 6 muaj.
Këto ndryshime kanë gjetur edhe mbështetjen e disa deputetëve, që pritet t’i propozojnë së shpejti Parlamentit shqyrtimin e Kodit Rrugor. Ndërkohë, Policia Rrugore ka mirëpritur edhe propozimin e deputetit socialist, Pjerin Ndreu, sipas të cilit, shtetasve të huaj që udhëtojnë në vendin tonë mos t’u pezullohet leja e drejtimit në rast shkeljeje, me kushtin e pagimit të dyfishit të vlerës maksimale të gjobës.
Burimi: Top Channel
