Hyrja te shëtitorja e Liqenit Artificial po transformohet krejtësisht. Bashkia e Tiranës ka nisur punën për transformimin e Parkut të Liqenit, si pjesë e punimeve për rikualifikimin e digës.
Rruga për te diga, tashmë është shndërruar në një infrastrukturë të re e praktike që mundëson krahas shkallëve, edhe kalimin me lehtësi të biçikletave dhe karrocave. Infrastruktura e re e shkallëve mundëson kalimin edhe nga hyrja për te shëtitorja e digës nga ana e Zoo Park.
Ndërkohë, ka nisur puna për vendosjen e kangjellave me elementë druri përgjatë shëtitores te diga, një masë e domosdoshme për të ndaluar kalimin e frekuentuesve te skarpati e për t’i orientuar drejt shkallëve.
Gjithashtu do të mbillen bimë dekorative përgjatë shëtitores duke zbukuruar një nga zonat më të frekuentuara e të dashura të Parkut të Madh! Ndërmarrjet e Bashkisë së Tiranës kanë riparuar pistën e vrapimit e cila do të ndihmojë jo vetëm ata që do të bëhen pjesë e Maratonës.
Për herë të parë, Liqeni i Tiranës do të jetë pjesë edhe e Maratonës së Tiranës, ku vrapuesit nga 40 vende të ndryshme të botës do të kalojnë.
Burimi: Panorama
