Pas dhënies së “dritës jeshile” nga ministria jonë e Shëndetësisë, edhe Ministria e Shëndetësisë së Kosovës ka nisur procedurat për përdorimin e plazmës konvaleshente të gjakut për pacientët me Covid.
Ministria e Shëndetësisë e Kosovës ka njoftuar se ka formuar një grup punues, që ka për qëllim hartimin e protokollit për përdorimin e plazmës kovaleshente për pacientët me koronavirusin e ri.
“Ky është një hap para për fuqizimin e menaxhimit dhe trajtimit gjithëpërfshirës të infeksionit COVID-19. Presim që Grupi punues brenda afateve të përcaktuara ligjore ta finalizojë protokollin në fjalë”, thuhet në një njoftim të Ministrisë së Shëndetësisë.
Ndarja e gjakut nga plazma bëhet në transfuzionin e gjakut. Dhe kjo metodë është aplikuar në vazhdimësi për shumë sëmundje në Kosovë. Disa infektologë në Qendrën Klinike Universitare të Kosovës (QKUK) kanë deklaruar se janë të gatshëm për një procedurë të tillë nëse merret vendim nga autoritetet kompetente.
Transfuzioni i antitrupave krijon atë që njihet si “imuniteti pasiv” te të prekurit me COVID-19.
Megjithatë, Organizata Botërore e Shëndetësisë ka paralajmëruar për kujdes lidhur me trajtimin me plazmë të gjakut, pasi ka thënë se ky trajtim është i një “cilësie të dobët”.
Kujtojmë se eksperimentet e para me këtë metodë, kanë filluar të aplikohen në Kinë që në janr të këtij viti, dhe kjo metodë më pas u mor edhe nga vende të tjera si si SHBA, Turqia, Italia, Kroacia, Spanja, Holanda, Austria, Blegjika, Danimarka, Finlanda,Francë, Gjermani, Greqi, Portugali, Zvicër, Norvegji, Britani e Madhe.
Nëse një person i infektuar me Covid shërohet, gjaku i tij ende përmban anti-trupat që ka krijuar organizmi kundër mikrobit. Këto anti-trupa janë përgjigja e sistemit imunitar të personit të sëmurë për të luftuar mikrobin. Kur një pacient injektohet me plazmën që përmban anti-trupa në formë serumi, pacienti mund të përfitojë mbrojtje shtesë imunitare.
Izolimi i plazmës dhe përdorimi i saj për qëllime terapeutike ka njëqind vite që studiohet. Kjo praktikë njihet prej kohësh dhe është përdorur edhe në kohën e gripit spanjoll të vitit 1918, në epideminë e fruthit në vitet 1930 dhe kundër ebolës. Pra trajnimi me plazëm është aplikuar edhe shumë më parë në sëmundje me karakter të njëjtë epidemik dhe virulence.
Përdorimi i plazmës konvaleshente kundër Covid-19
Përdorimi i plazmës konvaleshente, mund të shpejtojë pastrimin nga virusi, të rrisë numrin e limfociteve plazmatike dhe qelizave NK (qelizat natyrore vrasëse), të zvogëlojë nivelin e laktatit plazmatik dhe të përmirësojë funksionimin e veshkave.
Kështu që plazma praktikisht mund të përdoret te pacientët Covid-19 të sëmurë rëndë ose kritikë, por edhe tek pacientët që nuk janë të sëmurë rëndë./Iconstyle.al/
