Ashtu siç edhe ishte parashikuar, dogana e Kakavijës ka mbyllur punën dhe sportelet mbrëmjen e kaluar, menjëherë sapo ka kaluar ora 22:00.
Pavarërisht rradhës 20 km të gjatë, kaosit të shkaktuar te qytetarët dhe ndërhyrjes së shtetit tonë shqiptar, pala greke ka ndaluar gjithçka sapo ka mbaruar orari zyrtar.Kështu, qytetarët janë detyruar të presin në radhë deri në orarin zyrtar të hapjes, 06:00.
Mirëpo, mëngjesin e sotëm është shënuar një tjetër ngjarje e rëndë.
Një ambulancë, që transportonte të sëmurët, ka përplasur për vdekje një fëmijë. Përplasja ka qenë fatale për fëmijën, duke bërë që ky i fundit të ndërroje jetë. Ky aksident ndodhi në afërsi të fshatit Bularat, ndërsa viktima është vetëm 10 vjeç.
Pritet një lajmërim zyrtar nga policia për këtë ngjarje tragjike.
Ndërkaq, situata në Kakavijë sa vjen e rëndohet, e radha po shtohet përditë e më shumë.
Nuk dihet ende për sa kohë do të zgjasë situata, pavarësisht se në vendngjarje mbërriti edhe ministrja e Mbrojtjes Olta Xhacka.
Policia shqiptare, nëpërmjet një deklarate tha se qytetarët që duan të ikin në Greqi, të shikojnë si alternativë ikjen edhe nga Kapshtica. Ndërsa, pala greke sot po punon me staf të reduktuar, për shkak të festës të “Shën Mërisë”.
Në lidhje me situatën në pikën doganore të Kakavijës, ka reaguar edhe kryeministri Edi Rama.
Me anë të një statusi në “Instagram”, Rama shprehet se ndodhen në komunikim me palën greke e se po shihet lehtësimi i procedurave për kalim të kufirit.
Postimi i Edi Ramës:
Jemi në komunikim të vazhdueshëm me palën greke për lehtësimin e procedurave, të cilat janë procedura të njëjta në çdo pikë hyrëse të Greqisë, për qytetarët e çdo vendi, përfshirë edhe qytetarët grek që hyjnë në një kufi!
Në ndërkohë Forcat e Armatosura dhe strukturat bashkiake të Gjirokastrës, Këlcyrës, Dropullit, Tepelenës e Përmetit, e kanë gdhirë me qytetarët që qëndrojnë në radhë në Kakavijë duke ofruar ndihmë shëndetësore, ndihma ushqimore, ujë të pijshëm dhe asistencë për higjienën sanitare në terren.
