Një fëmijë ka humbur jetën për herë të parë nga Covid-19 në vendin tonë. Është mësuar se bëhet fjalë për një vajzë 16-muajshe.
Vogëlushja ishte shtruar para disa ditësh në reanimacion dhe është bërë me dije se kishte lindur me probleme shëndetësore e se ka pësuar komplikacione. Mediat kanë raportuar se foshnja ishte nga qyteti i Durrësit.
Nga të dhënat e para mësohet se vajza ka pësuar një hemorragji dhe se ka qenë në gjendje të rëndë shëndetësore. Ndërkohë ditën e djeshme u raportua se në pediatrinë Infektive në QSUT janë të shtruar 10 fëmijë të prekur nga koronavirusi. Thuhet se gjendja e tyre shëndetësore është e qëndrueshme dhe fëmijët po mbahen të gjithë nën monitorimin e mjekëve.
Prej ditësh në vendin tonë shifrat e të prekurve me Covid-19 janë shtuar me ritme të larta. Vetëm ditën e djeshme u shënuan 786 raste të reja me koronavirus dhe humbën jetën 11 qytetarë pas infektimit.
