Ajo është një ndër këngëtaret e muzikës popullore më të dashura për publikun shqiptar. Bëhet fjalë për artisten Irini Qirjako, e cila ishte e ftuar sot në emisionin “Ditë e Re” ku foli jo vetëm për jetën e saj profesionale, por edhe personale.
Irini rrëfeu për herë të parë një ndër momentet më tragjike në jetën e saj. Këngëtarja tregoi në studio se ka sjellë në jetë binjak, një vajzë dhe një djalë, mirëpo 3 ditë pas lindjes djali i saj nuk arriti të mbijetonte dhe vdiq.
“Unë jam mami i një goce, Riviolës. Kisha dy fëmijë, një çun dhe një gocë, bëra binjakë por nuk qe e thënë që të më rronte çuni. Vdiq ditën e tretë të lindjes. Kam vajzën, është doktoreshë në Gjermani”, tregoi këngëtarja e prekur.
Irini rrëfeu ndër të tjera se të jesh artist është shumë e vështirë dhe ajo ia ka dalë mbanë vetë falë mbështetjes pa kushte që i ka dhënë familja e saj.
“Ne artistet jemi shumë të forta, por në momente pune voluminoze dhe që ka një përgjegjësi të madhe, sigurisht që kemi ndihmë nga familja. Bashkëshorti im më ndihmon kur kam shumë punë sepse gjendja ime shpirtërore duhet të jetë e qetë, apo që të mos sëmurem sepse po të fus duart në ujë ftohem”, tha Irini.
